ٹی وی شو میں بن بلائی ’’چمگادڑ‘‘ نے اینکرز کو تگنی کا ناچ نچا دیا

نیویارک: براہ راست پیش کئے جانے والے پروگرامات کے دوران اکثر وبیشتر ایسے غیریقینی واقعات رونما ہوجاتے ہیں جو نہ صرف اینکر پرسن کے لیے بلکہ ناظرین کے لیے بھی یاد گار بن جاتے ہیں اور ایسا ہی ایک واقعہ پیش آیا امریکا میں جہاں ایک لائیو شو کےدوران اچانک چمگادڑ بن بلائے مہمان کی طرح اسٹوڈیو میں داخل ہوگئی اور وہاں موجود اینکرز کو تگنی کا ناچ نچا دیا۔

ہوا کچھ یوں کہ امریکی ٹی وی پر ’’گڈ مارننگ شو ٹیینیسی‘‘ جاری تھا اور اسے 3 اینکرز بو ولیم، ٹیئرسا اور ماہرموسمیات جولیا جونسن پیش کررہے تھے۔ تینوں اینکرز بڑے انہماک سے پروگرام کو جاری رکھے ہوئے تھے کہ اچانک ایک چمگادڑ اسٹوڈیومیں داخل ہوگئی اور یہ جانے بغیر کہ پروگرام براہ راست نشر کیا جارہا ہے اسٹوڈیو میں اپنی پرواز کی مہارت دکھانی شروع کردی، اب کیا تھا چمگادڑ کی یہ اچانک آمد ان کے لیے کسی مصیبت سےکم نہیں تھی، چمگادڑ کبھی ایک اینکر کے اوپر سے پرواز کرتی ہوئی ایک کونے سے دوسرے کونے پہنچ جاتی اور کبھی دوسرے اینکر کے کان کے قریب اپنی میٹھی آواز میں گانا سنانے کی کوشش کرتی۔ چمگادڑ سے بچنے کے لئے اینکرز نے اپنی کرسی پر تیزی سے ادھر ادھر گھومنا شروع کردیا اور یوں محسوس ہورہا تھا کہ تینوں بیٹھ کر کسی گانے کی دھن پرناچ رہے ہوں۔

چمگادڑ کو شاید اسٹوڈیو اور اینکرز کچھ زیادہ ہی پسند آگئے اورانتظامیہ کی تمام تر کوشش کے باوجود وہ انہیں نکالنے میں کامیاب نہ ہوسکے تو مزید کمک طلب کرنی پڑی اور بالآخر 3 گھنٹے کی انتھک محنت کے بعد چمگادڑ ان کے قابو میں آہی گئی لیکن اس کوشش میں ان کے پسینےچھوٹ گئے، اسےکہتے ہیں مان نہ مان میں تیرا مہمان۔